لما خطبنا سكرت كل شي اله علاقة بالنت، وضليت احكي معه عالتلفون بس لأنه بغار!

تزوجت وانا عمري 20 👰

كنت شايفته ومش مصدقة، شب طويل ، حلو، محترم ، اول ما فكر يتقدملي حبيته وانا كنت لساتني طالبة سنة اولى بالجامعة

كنت مبسوطة وطايرة في، بغار علي كثير، وعصبيته بتجنن، كنت اكيّف لما يحكيلي بقص رقبتك اذا شفتك واقفة مع زميل حتى !

وعالطالعة والنازلة يتدخل بكل شي بحياتي، انا كنت بدرس فنون وحلمي اصير فنانة مشهورة ، وافتح معارض خاصة فيي،قبل ما اعرفه كنت دائما انزل رسومات الي عالصفحة والكل يحكيلي اني مستقبل فنانة رائعة، بس لما خطبنا سكرت كل شي اله علاقة بالنت، وضليت احكي معه عالتلفون بس لأنه بغار!

حتى بطلت ارسم مثل زمان، وبالجامعة تراجعت كثير، كان وضعه المادي منيح وهالشي كان مريحني …

واحنا سنة ثالثة حكالي لازم نتزوج؛ قلتله استنى لاخلص جامعة ، قلي شو بدك بالجامعة انا بشتريلك كل شي بدك يا بدون ما تشتغلي !

وبعد اكثر من مرة هو يقنعني نتزوج، اقتنعت نتزوج بس أأجل فصل ونكمل بعدين !

تزوجت، ولبست الفستان الي بحلم في طول عمري، وكنت مثل الأميرات ليلة عرسي …

اول شهر زواج صرت احس بشي غريب، غيرته عشغلات تافهة صارت تخنقني بدل ما تبسطني، عصبيته الي كنت بحبها ، صرت اكرهها!

بس حكيت يمكن لأنه لسا جداد وما تعودنا عبعض، رجع هو عشغله وانا صرت اقعد بالدار طول اليوم، صرت ازهق، واشتقت للجامعة والدراسة، حكتله بدي ارجع عالجامعة، قلي أجليها كمان فصل خلينا نعيش حياتنا، واانا سمعت كلامه،

يوم تخرج دفعتي، اتصلت علي صاحبتي تعزمني، انا كنت وقتها حامل بالشهر الثالث، بعد مليون محاولة معه قبل يخليني اروح عالحفلة، شفتها كان معها زوجها، وكان واقف معها زلمة كبير بهنيها عتفوقها بالمعرض؛ حكتلها اي معرض؟

حكتلي قبل اسبوع ومسكت بإيد زوجها فتحت معرض خاص فيني وحقق نجاااح كبير ورح اسافر عايطاليا!

زوجها ابتسم وحكالها رح نسافر سوا، كان الفخر بعيونه، كيف مشجعها عكل خطوة؛ وكيف بحكي عنها بكل ثقة

كلمة حكاها انغرزت بقلبي مثل الرصاصة، صار يحكي انا اصلا فخور بنجاح مرتي !

بصوت هادي مني سألته ؛وما بتغار عليها؟

قلي بغااار بس واثق فيها، وواثق بنجاحها؛ وانا معها دائما ….

دمعوا عيوني، وصرت امشي لعند الكلية تبعتي؛ تذكرت قديش كنت بنت مليانة طموح وشغف وحب للنجاح،

كنت قبل ما اشوفها احكي الزواج منعني من تحقيق احلامي بس بعدهم اتاكدت انه اختياري الي منعني من هالشي

وكيف بعد ما تزوجت نسيت هدفي وحلمي، اكتشفت انه

اختياري الي كان غلط مش الغلط بالزواج؛ لانه هيها تزوجت وبتحقق كل لي ببالها؛ رن تلفوني كان زوجي معصب ؛ شووو بتعملي مع مييين واقفة انا الحق علي لي خليتك تطلعي …

ما حكيت ولا كلمة وسكرت التلفون، ورجعت كملت مشي وعياط!

اعيط عشو ،،،، عمستقبلي وحلمي الي ضاع…

لا تتزوجي الا حدا يغار عليكي من الفشل؛يعصب عليكي لما توقفي وما تستمري، لا تتزوجي وانتي مبسوطة عغيرته وشكله ، هدول بعد الزواج بصيروا يخنقوكي!

حلو الزوااج الي اساسه فهم واحترام وحب ، والنجاح الي بحققوا ال2 سوا ❤

#هديل_قاسم

إغلاق